مفضلات اي هيرب .. iherb favorites

بسم الله الرحمن الرحيم

السلام عليكم و رحمة الله و بركاتة 

عملت تصويت في الانستقرام بين موضوعين انزلهم بالمدونة الاول مفضلات اي هيرب و الثاني ايش اكلت في يوم؟ و الاغلب اختار مفضلات اي هيرب و لا اخفيكم سرا انه كان نفسي تختاروه عشان في الفتره الاخيره جربت من عندهم منتجات عجبتني .. و انا شخصيا استفيد من المواضيع اللي تتكلم عن منتجات من موقع معين او مكان انا مهتمه بمنتجاته يساعدني اختار بشكل صحيح مو بطريقة عشوائيه ..

1-الخميرة الغذائية

كنت اشوفها كثير في اليوتيوب و الانستقرام عند الاشخاص النباتيين لانها تعتبر بديل عن الجبنه وتعطي نكهة الجبن بالاكل , في البدايه ماكنت مقتنعه فيها خصوصا اني مو نباتية لان ببساطه اقدر اكل الجبنه العاديه و اقدر اضيف جبنة موزوريلا قليلة الدسم في الاكل استهلكها في اعتدال و تمشي الحياة , بس بعد ما قرأت اكثر عن النباتيه و شفت اكثر من وثائقي يتكلم عن الاكل النباتي بدأت اخفف من المنتجات الحيوانيه و اول قرار كان التقليل من الجبن , اول بديل كان قدامي هو الخميره من اي هيرب فقررت اجربها كانت مفاجأه بالنسبه لي انها عجبتني طعمها قريب للجبن بنسبة 60% فيها مراره شويه و لكن ممتازه في الاكل مع المكرونات و الصوص و الشوربات اي شي احنا متعودين نضيف له جبن استبدلتها في الخميره , مكوناتها بسيطه و سهله خميره و معاها فيتامينات B , سعيدة اني قررت اجربها و ادخلها في النظام الغذائي بدون ما احس اني انحرمت من شي .. 

هل راح ارجع اشتريها ؟ اكيد 100% 

2- القرانولا : 

قرانولا بالفراولة و الشوكلاتة دايما كنت اشوفها بأول صفحه في موقع اي هيرب ودائما عليها طلب و مخلصه , كنت مستبعده شرائها رغم تقييمها العالي خصوصا بعد ما قررت اني ما اشتري اي قرانولا او حبوب افطار جاهزه بسبب نسبة السكر العاليه اللي عادة تكون موجوده فيها , قررت اني اتعلم طريقة القرانولا في البيت و اسويها و كنت مكتفيه فيها , و لكن من كثر مااشوف هالنوع في كل مكان ماقدرت امنع نفسي من التجربه و طلبتها , لذيذه طعمها رائع و قطع الشوكلاتة اللي فيها مع الفراولة المجففه نكهتها واضحه و مكوناتها معتدله و نظيفه ماتحتوي على مكسرات و لا زبيب , تحتوي على سكر القصبهل اكرر شرائها ؟ مااعتقد , مو لانها سيئه و لكن انا افضل القرانولا المنزلية عن اي شي جاهز بالسوق , سعرها مرتفع نوعا ما على كميتها , من رأيي الشخصي خيار ممتاز للي مايحبوا القرانولا المنزليه او وقتهم ضيق .

3- المكسرات المشكلة من now

كنت ادور حبوب و مكسرات في اي هيرب عشان اعمل فيها القرانولا و لقيت نفسي ضعت من كثرة الانواع و الخيارات خصوصا اني كنت حريصه اضيف حبوب و مكسرات للقرانولا قد ما اقدر لان اسهل علي اكل انواع متنوعه من المكسرات في طبق واحد , المكسرات عندنا تعتبر نوعا ما سعرها مرتفع لو ح اشتري كل نوع لحاله , شفت الخليط هذا و ماترددت اني اخذه يحتوي على لوز و كاجو و عين الجمل و زبيب و بذور اليقطين غير مملحه و غير محمصه مافي احلى من هذي المكونات للقرانولا المنزليه .

هل اكرر شرائها ؟ اكيد 100% و للان طلبتها اكثر من مرة , كميتها ممتازه و سعرها معقول جدا جدا .

طريقة القرانولا المنزليه 

4- محلي ستيفيا 

كنت متعوده استخدم سكر ستيفيا البودره ولكن قرأت عنه و الكثير ينصح في ستيفيا السائل و ليس البودره ماعندي خلفيه عن صحة المعلومات و لكن قررت اجرب و اشوف , في اي هيرب لقيت انواع كثيره جدا واخذت اكثر نوع كان عليه تقييم جيد , جربته مع الشاي و القهوه و في الحلى الصحي من ناحية الطعم ما حسيت بأختلاف نفس طعم البودره عجبني في السوائل اكثر من الحلى , ارتحت على السائل اكثر لان حسيت اني قاعده استخدم كميه قليله مقارنة بالبودره في السائل استخدم فقط من 8 الى 10 نقط في البودره استخدم ملعقة شاي صغيره , اختيار البودره او السائل يرجع لتفضيل شخصي لان بالنسبه للطعم كلهم نفس الشي , لو في طبخه زي كيك صحي او بان كيك افضل البودره .

هل اكرر شرائها ؟ نعم بالنسبه لي مريح اكثر من البودره . كميته كبيره لان ما نحتاج نستخدم غير نقط فقط و سعره معقول 

5- صابون الجسم من natures gate 

بعد مشاهدتي لأكثر من فيلم وثائقي عن الصحه و الامراض و اسبابها  ( دائما اشارك الافلام اللي اشوفها في الهاي لايت على حسابي في الانستقرام )  بدأت ادور عن بدائل طبيعيه اكثر لأي منتجات نستخدمها يوميا زي الصابون و الشامبو و منتجات التنظيف عموما , و اي هيرب طبعا هو الخيار الامثل لقيت كثير خيارات في اي هيرب لصابون الجسم و انا جربت من عندهم الصابون الافريقي تكلمت عنه في موضوع التقشير الجاف و لكن حبيت اغير لأنواع جديده عرفت هالصابون من مدونة هيا اكيد الكل يعرفها تكلمت عنه في تدوينتها و رحت شفت مكوناته في الموقع خالي من البارابين و مكوناته نوعا ما طبيعيه يحتوي على زيوت و هذا شي كويس , التقييم عليه عالي في اي هيرب , تجربتي معاه كانت عاديه جدا زيه زي اي صابون اخر و انا اشوف ان هذا شي ايجابي لان رغم مكوناته الطبيعيه الا انه ما اختلف في فعاليته عن الصابون العادي او اللي يحتوي على مكونات كثيره و معقده ,  فكرة اني قاعده استخدم شي اقل ضررا من غيره هذا شي مريح للنفس ..

هل اكرر شرائها ؟ نعم و جربت اكثر من نوع من نفس الصابون .

6- مزيل رائحة العرق 

نفس فكرة الصابون كنت ابحث عن شي طبيعي اكثر و معروف منذ القدم ان حجر الكرستال الابيض يستخدم لأزالة رائحة العرق , الحلو فيه انه حجر فقط بدون اضافة اي مكونات اخرى تقييمه عالي في اي هيرب ,طريقة استخدامه ممكن ما تكون عمليه او مناسبه للبعض و لكن يستاهل الجهد شوي بسبب انه شي طبيعي نستخدمه بشكل يومي , فعاليته ما تقارن بمزيلات العرق الاقوى و لكن جيد و مقبول يستمر تقريبا لمدة 12 ساعه تجربتي معاه في الشتاء في الصيف مااعتقد ح يكون مفيد الا في ايام قليله و داخل البيت .

 

هل راح ارجع اشتريه ؟ نعم الى ان احصل بديل اقوى لمزيل رائحة عرق طبيعي او ارجع لمزيل الرائحه الطبيعي المنزلي كتبت عن طريقته .. مزيل رائحة عرق طبيعي

 

 

ايش اكثر منتج ممكن تشتروه من المنتجات ؟ شاركوني ارائكم في التعليقات تخليني سعيده .

 

شكرا على وقتكم .. دمتم بصحة و عافية

 

 

الإعلانات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

This site uses Akismet to reduce spam. Learn how your comment data is processed.