افضل مواقع للتسوق اون لاين من تجربتي الشخصية .. best online shopping wepsites

بسم الله الرحمن الرحيم 

السلام عليكم و رحمة الله و بركاتة 

التسوق عن طريق الانترنت في السنوات الاخيره تتطور جدا و تقريبا كل براند او مركز تسوق صار يوفر ميزة الطلب اون لاين , في الطلب اون لاين غالبا الاسعار ارخص و فيه عروض يومية ومميزات و اكواد خصم هذا غير توفير الوقت بدل ماانزل السوق و امشي و اتعب و الزحمة و رحلة البحث عن قطعة مناسبه , اسوي هذا كله و انا في بيتي .. اعتقد ان معظم الناس اليوم اعتمادهم في التسوق على الانترنت و اللي للان مو مقتنعين او حاسين الموضوع صعب في النت مليان مواضيع تتكلم بالتفصيل عن طريقة الطلب اون لاين كل اللي تحتاجوه بطاقة فيزا مسبقة الدفع و اصدارها جدا سهل عن طريق موقع البنك و البنك يوصلها لكم للبيت مو محتاجين تروحوا للبنك جربوا اول مرة ومع الوقت تشوفوا الموضوع سهل و اريح و اوفر .

انا جربت مواقع جدا كثيره اطلب منها و الحمدالله دائما خياراتي للمواقع اكون راضيه عنها و مااواجه مشاكل فيها ح اذكر اكثر مواقع تعاملت معاها و طلبت منهم : 

1- موقع نمشي .. Namshi 

اشهر موقع عربي للطلب اون لاين مقرهم في الامارات يحتوي على اغلب الماركات الموجودة بالسوق و اول موقع جربت اطلب منه تجربتي معاهم ممتازة جدا الحمدالله جربت اطلب منهم ملابس و احذية و شنط و منتجات تجميل و كل شي بموقعهم و كل تجربة معاهم كانت مريحه و الطلب يوصل سليم سواء من التغليف او من القطع , الترجيع و الاستبدال عندهم رائع و مجاني و خطواته سهله يمكن انا اكثر وحدة عندهم رجعت و بدلت و في كل مرة كان تعاملهم ممتاز , خدمة العملاء بتويتر جيده و سريعه , من ناحية التوصيل ما واجهت مشاكل معاهم يوصلوا عن طريق ارامكس و احيانا عن طريق سمسا التوصيل يعتمد على شركة الشحن انا اشوف ارامكس افضل بمراحل من سمسا بس بشكل عام الموقع عربي وممتاز كبداية للتجربة . التوصيل و الشحن عندهم فوق 100 ريال مجاني وعندهم دفع عند الاستلام .

سلبيات نمشي : بعض من المنتجات عندهم ممكن تلاقوها بسعر ارخص في مواقع ثانية .

2- موقع اسوس .. asos 

موقع بريطاني معروف جدا عالميا فيه ازياء و منتجات تجميل و منزل و اكسسوار و تكنولوجيا اطلب منه كثير و في كل مرة توصلني الطلبية بدون مشاكل و بحالة ممتازة الحمدالله بضاعتهم جودتها ممتازة لان الموقع يبيع منتجات اسوس و منتجات لماركات اخرى منها معروفة و منها ماركات بريطانية , الموقع مو بالعربي و لكن سهل التعامل مع الموقع و الخيارات واضحة و سهله , مقاساتهم تعتمد على المقاسات البريطانية انا عشان اعرف مقاسي بالضبط اشوف اي قطعة عندي بالبيت مكتوب عليها المقاس بالبريطاني و اعتمده و توصلني القطعه على المقاس بالضبط , شحنهم مباشر بدون الحاجة لبريد امريكي او بريطاني , الشحن مجانا لو طلبيتك كانت فوق مبلغ معين محدد عندهم , خدمة العملاء عندهم ممتاز لي تجربه معاهم حلوه لان وحده من القطع اللي طلبتها وصلتني فيها قطع بسيط جدا مع الطرف و راسلتهم بتويتر و تجاوبو على طول و قالوا لي ان ح نرسل لك قطعة جديده مثلها مجانا ومايحتاج ارجع ارسل اللي عندي , حبيت تجاوبهم .

السلبيات : المقاسات و القطع عندهم تخلص اول بأول . 

3-موقع سوق دوت كوم .. souq.com

اول ما تعرفت على الموقع كنت متخوفه اطلب منه خصوصا انه تابع امازون و نظامهم بائعين و ليس الموقع نفسه اللي يبيع المنتجات و لكن الاسعار عندهم ممتازة و تهورت و اول طلبيه من عندهم كانت طقم شنط سفر اول مره اطلب من النت شي حجم كبير و كنت متوقعه انه قيمة الشحن تتطلع غاليه و لكن الميزة في سوق انه تقدري تختاري و انتي تتدوري على المنتجات خيار الشحن المجاني منهم وهذي ميزه تنحسب لهم , وصلتني الشنطة الكبيرة للاسف فيها كسر بسيط و تواصلت معاهم و قالوا لي انه اقدر اردها و استرجع المبلغ و لكن انا كنت مستعجله و رفضت ارجعها خصوصا ان الشنطة الحجم الكبير ما استخدمها كثير بعد تجربتي الاولى ترددت ارجع اطلب منهم و لكن طلباتي الاخرى كانت تجاربي ممتازة طلبت من عندهم اجهزة مطبخ و شنط و مكياج و اكسسوارات الاكترونية و طلبت منهم كاميرا  canon g7x markii ووصلتني ممتازة و الاسعار طبعا ارخص بكثير من السوق و لكن اهم شي معرفة اختيار البائع و قراءة التقييمات . عندهم بعض السلع شحنها مجاني و يوجد دفع عند الاستلام , لاحظت ان شحنهم سريع خلال يومين توصلني الطلبية .

السلبيات : لا يوجد 

4- موقع سنتربوينت .. centerpoint 

احب هالمحل لانه يشمل كل شي و اسعارهم معقوله و بضاعتهم جودتها ممتازة و لكن الزحمة عندهم و الوقفه الطويله عند المحاسب تخليني ابطل اشتري منهم و بعد مافتحوا التوصيل اون لاين عن طريق موقعهم عشقتهم اكثر .. صرت اروح المحل و اشوف القطعه اللي تعجبني و ارجع اطلبها اون لاين طلبت منهم منتجات قابلة للكسر و الحمدالله وصلتني بحالة ممتازة و التغليف رائع , اسعارهم في الموقع ارخص من المحل و العروض و التخفيضات في الموقع تكون حصرية , التوصيل عندهم سريع خلال اسبوع او اقل و فوق 100 ريال مجاني وعندهم دفع عند الاستلام .


السلبيات : بضاعة الموقع اقل بكثير من البضاعه في المحل

ايش اكثر موقع جربتوه و هل تفضلوا التسوق اون لاين ؟ شاركوني في التعليقات

شكرا على وقتكم .. دمتم بصحة وعافيه

 

الإعلانات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

This site uses Akismet to reduce spam. Learn how your comment data is processed.