افضل 5 منتجات تجميلية جربتها .. my TOP 5 beauty products

بسم الله الرحمن الرحيم 

السلام عليكم و رحمة الله و بركاتة 

انا لست من الناس اللي مهووسة بالمكياج و عندي خزائن و ادراج عديده فقط تحتوي على المكياج على العكس تماما انا مكياجي كله اشيله بشنطة مكياج وحدة لاني اذا جربت شي و عجبني مااحب اغير عنه و في الغالب اكرر شرائه خصوصا بالمكياج لاني مااستخدمه كثير و مو شي اساسي عندي , في منتجات معينه تعجبني بالمكياج و ماغيرتها من زمان وحابه اشاركها معاكم .

( بالضغط على اسم المنتج يأخذكم لرابط المنتج ) 

اساس هيلثي ميكس من بروجوا .. foundation healthy mix from bourjois 

ماابالغ لو قلت ان كررت شرائه على مدى الثلاثة سنوات الماضية جربته في جميع احوال بشرتي في فترة كنت اعاني من حبوب و فترة بشرتي مافيها حبوب و في كل الحالات كان بالنسبه لي يفي بالغرض و زياده .. بشرتي عادية الى مختلطه و ناسبني اختي بشرتها دهنية و ناسبها امي بشرتها جافه و برضو ناسبها المنتج رائع جدا و ينافس الاساسات من ماركات غالية , تغطيته كامله و ممتازه حتى لو البشرة فيها مشاكل خصوصا اذا حطيت منه طبقتين , يندمج مع البشره بشكل حلو بدون تكتل خصوصا اذا مرت عليه ساعه بعد الاستخدام مااستخدم معاه بودرة لاني احس انه ما يحتاج الاساس يثبت لمدة ممتازه و مايدهن لي المنطقة الدهنية في بشرتي احتاج معاه كونسيلر لتحت العين فقط , سعره يختلف اختلاف شاسع اغلى شي لقيته 110 و ارخص شي لقيته بسوق دوت كوم 47 و طبعا طلبته لان فرق السعر يغري . 

خافي عيوب مايبيلين .. maybelline instant age rewind concealer 

اول كونسيلر و اخر كونسيلر جربته و لله الحمد , في السابق ماكنت استخدم كونسيلر و لمن جربت هذا لأول مرة ماغيرت عنه ماعندي خبرة باللي موجودة بالسوق لاني مكتفيه فيه و بالنسبة لي يؤدي الغرض المطلوب استخدمه لحاله او مع اساس تحت العين و على بعض اثار الحبوب على بشرتي و يغطيها لي بطريقه ممتازه وتحت العين ما واجهت معاه مشاكل مثل انه يخطط او يروح بالعكس يثبت لفترة ممتازة و مايخطط و لكن طريقة الدمج اتوقع تفرق بالنتيجة اذا دمجته بفرشة يخطط معاي و اذا دمجته بأصابعي النتيجه تكون رائعة جدا احتاج اثبته في بودرة بعد ما احطه خصوصا تحت العين احس يعطي تغطية اكثر درجتي ميديم و اتوقع تناسب معظم البشرات العربيه .

جل الحواجب من ريميل .. rimmel brow gel 

مسكرة للحواجب شفافة , انا ماارسم حواجبي و لا استخدم اي منتج للحواجب لاني افضل شكل الحاجب الطبيعي اكثر و كنت ادور على شي فقط يرتبها لي و يخليها تثبت في مكانها بدون ما اغير في رسمتها او لون الشعر , اشتريت المنتج هذا عن طريق الصدفة و هذا نادرا ما يحدث بالعادة بالمكياج اروح عارفة ايش احتاج و محددة المنتج و لكن ريميل كان مسوي عرض و الموظفة اقترحت علي هذا المنتج و قلت خليني اجرب و انا اساسا ادور على مسكرة حواجب , المنتج مااقدر اقارنه باللي بالسوق لاني ماجربت غيره و لكن رائع و بالنسبه لي يؤدي الغرض فقط فرشاة لتمشيط الحواجب و جل شفاف لتثبيتها يثبتها بشكل مقبول نوعا ما بدون مايترك اثر على الحواجب و هذا المهم .

ارواج من انقلوت .. lipstick from inglot 

يمكن اكثر منتج اشتريه و استهلكه في المكياج هو الارواج , مااغير في الالوان اللي اشتريها و لكن احب اجرب انواع جديده , انقلوت كانوا مسويين تخفيضات و ماعمري جربت شي من عندهم فقلت كتجربة اولى خليني على الارواج الموظفة ساعدتني بالاختيار و اعطتني اكثر درجات مبيعا عندهم , انا مو من اصحاب الارواج المطفيه او المات تركيبة الارواج اللي اخذتها من عندهم فيها لمعة خفيفه و كريميه و ماتنشف الشفايف و هذا طلبي , حبيت الارواج و الوانها جدا جدا ثباتها ممتاز مقارنة بأنها كريميه البديل الارخص لها ارواج مايبلين تكلمت عنها في موضوع مفضلات مفضلاتي الاخيرة

علبة ظلال من ذا بالم .. meet matt from the balm 

انا مو من اصحاب الظلال و من النادر جدا احط في مناسبات محدودة جدا جدا , كنت ادور على علبة فيها فقط الوان مطفيه و طبيعيه و قليله تناسب احتياجي ووقع الاختيار على الاصدار الاول من ميت مات من ذا بالم , الوانها تناسبني جدا و فعلا استخدمت كل لون بالعلبة و كنت اجرب بالوان بدون مااخاف لانها كلها طبيعيه و تتدمج بسهولة مع بعض بدون مااتعب في تنسيق الالوان و اختراع رسمة عين بسيطة .

ايش من المنتجات جربتوه و عجبكم ؟ 

شكرا على وقتكم .. دمتم بصحة و عافية .

 

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

This site uses Akismet to reduce spam. Learn how your comment data is processed.