تجهيز العروسة .. ( الدبش )

بسم الله الرحمن الرحيم

 السلام عليكم و رحمة الله و بركاتة ..

ذكرت بالانستقرام قبل فترة ان عندي نيه انزل موضوع كامل عن تجهيز العروسة و ايش النقاط المهمة و الاخطاء اللي ممكن تقع فيها اي بنت و جاتني اسئلة كثير و طلبات على الموضوع وتحمست اني اكتبه وانشره بأقصى وقت ممكن , رغم انه بجدول التدوين الموضوع المفروض ينزل على شهر مارس و لكن ماحبيت أأجله اكثر لان موسم الزواجات عندنا قرب و غالبا العرايس تجهز من قبلها بكم شهر .
لمن كنت اجهز لنفسي اغلب المواضيع اللي لقيتها على الانترنت كانت عبارة عن جداول و تقسيم للمهر و من كل شي كم عدد لازم اشتري انا الطريقة هذه اشوفها غير منطقية و غير عملية , و صراحه ما استفدت منها شي ابدا لان ظروف الناس و عاداتهم تختلف اختلاف شاسع ذوق و طريقة تفكير كل بنت تختلف عن الثانيه و العمر وتحديد تاريخ الزواج عامل جدا مهم في اختيارات كل بنت , وقت التجهيز يفرق فيه بنات عندها وقت تجهز فترة طويلة و فيه بنات ظروفها تحتاج انها تجهز بوقت قصير , الاختلافات بين البنات فيه بعضهم تحب الاكسسوارت و المجوهرات اكثر من اللبس و تعرف تنسق لبس واحد و تغيره فقط من خلال المجوهرات , و فيه بنات يهمها الكمية مو النوعيه في جهازها و فيه بنات تحب تصرف على اشياء معينه و ماتحب تصرف على اشياء ممكن تكون بنظرها غير مهمة , طريقة حياة كل بنت تختلف فيه بنات تستمتع بشراء الشنط اكثر من الملابس و فيه بنات عندها مشاكل معينه تبغا تحلها قبل لا تصرف على الكماليات الاخرى و فيه بنات………. الخ القائمة تتطول , انا ح اذكر نقاط عامة استفدت منها و الباقي يرجع لك انتي و ادارتك للمال و الصرف و احتياجاتك الشخصية :

خطوات ضرورية للبداية :

1 – اذا عندك حساب بالبنك حطي المهر بحسابك و اذا ماعندك حساب روحي افتحي حساب و حطي المهر فيه و ضروري جدا جدا ان يكون عندك بطاقة للشراء من الانترنت ح تنفعك كثير وتوفر عليك وقت و مال.
2 – اعتمدي على الشراء من النت و التسوق اون لاين في مشترياتك ح يوفر عليك كثير و تستفيدي من الخصومات و العروض و اكتفي بالسوق فقط للاشياء اللي مو متوفرة اون لاين
3 – جيبي ورقه و اكتبي ايش الاشياء الضروريه و الاولوية اللي لازم تتدفعي عليها قبل التجهيز زي مثلا .. الفستان وحجز الكوفيره و التصوير و الذهب و اذا فيه عندك مشاكل معينه تبغي تعالجيها اسنان ، ليزر لشعر الجسم ، علاج للبشرة ….. الخ على حسب احتياجك و ابحثي عن كل شي منهم كم ح ياخذ منك ميزانية تقريبا , المصورة اللي انتي تبغيها اتصلي عليها و شوفي كم تتدفعي لها , الفستان اللي تبغيه كم ح يكلفك , لو تبغي تحجزي عياده اتصلي و اسألي عن الاسعار , بالنسبة للذهب اسألي نفسك هل انتي تحبي الذهب الناعم الخفيف او الذهب الثقيل ؟ هل الذهب جدا مهم عندك و ح تدفعي عليه جزء كبير او الذهب عندك امر ثانوي و انتي ماتحبي تلبسيه و ح تخصصي ميزانية قليلة له ؟ اعرفي كل شي حطيتيه بالقائمة كم ح يكلفك تقريبا بعد ماتسوي هذي الخطوة شوفي كم باقي عندك من المهر , ابدأي في التنفيذ و احجزي مواعيدك سواء تصوير او كوفيره او عيادة و ادفعي العربون لو فيه شي يحتاج .

اللبس يشمل ملابس البيت ملابس الخرجه , جزم و شنط و ساعات :

اول شي بالنسبة لي اشوفه مهم جدا انك ماتحددي اختياراتك بناء على اختك او بنت خالتك او صحبتك او توصيات من النت , حددي اختياراتك حسب ذوقك انتي و اسألي نفسك تحبي الالوان الهاديه او القوية ؟ تحبي لبسك يكون كلاسيك و ناعم او جريء و على الموضة ؟ مو لازم عشان انتي عروسة تشتري كل الالوان و كل الاشكال لا تغيري ذوقك بس عشان انتي عروسة , الشي اللي انتي متعوده تلبسيه و يناسبك لا تغيريه اذا انتي ماتحبي تلبسي تنانير مو لازم تشتري ببساطة , امشي على هذا المبدأ طول فترة التجهيز عشان بعد زواجك تحسي انك قاعده تلبسي كل شي و كل شي يناسبك و على ذوقك , ملابس البيت اختاري الاشياء المريحه لك عشان ماتطفشي منها بسرعه و بنفس الوقت حلوه عليك فيه خيارات كثيره سواء انواع البجايم طويلة او قصيرة زي الشورتات و غيرها او انواع ملابس النوم الحرير و الدانتيل ( اللانجري , الملابس الداخلية ) , ادخلي المواقع في تدوينة افضل مواقع للتسوق اون لاين ممكن تفيدك و تاخذي فكرة , ملابس الخرجه على حسب عاداتكم بعد الزواج اذا العزايم كثيره و تحتاجي لبس او اذا الخرجات قليله و ممكن تكتفي بقطع محدوده , في لبس الخرجه دايما اختاري الالوان المحايده و القطع اللي ممكن تلبسيها بأكثر من التنسيق , مافيه عدد او كمية محدده لعدد اللبس يعتمد على ميزانيتك و كل قطعه كم كلفتك اختاري الاشياء الحلوه والمريحه لك هذا المهم العدد مو مهم لان السوق موجود طول العمر و تقدري تتسوقي مستقبلا .

في الشنط تاخذي شنطة او اثنين جودتها عالية وسعرها مناسب و الوانها محايدة مثل الاسود و البني وتمشي مع كل لبسك افضل مية مره من خمسه او سته شنط جودتها عاديه و الوانها ماتناسبك زي الاحمر و الابيض و الاصفر , نفس الشي للساعات و الجزم اختاري ساعة جودتها عالية فضي وذهبي مع بعض عشان تناسب تلبسيها مع مجوهرات فضي او ذهبي , في الجزم خذي اللي انتي مرتاحه عليه اذا ماتحبي تلبسي كعب مو لازم تشتري كعب , اختاري الانواع اللي انتي متعوده تلبسيها و ترتاحي لها و لا تنسي تاخذي شي مريح للمشاوير الطويلة او السفر .

المكياج و العناية و العطور :

بالنسبة للمكياج لا تشتري مكياج كامل جديد اذا مكياجك الحالي كويس و جودته حلوه لا ترميه خذيه معاك , المكياج غالي و يحتاج ميزانية لحاله شوفي فقط ايش اللي ناقصك و كملي عليه , اعملي فرز لمكياجك عشان تحددي ايش اللي ممكن تاخذيه معاك و ايش ناقصك , لاتشتري انواع مكياج انتي مو متعودة تستخدميها مثل علب الظلال اللي فيه كل الالوان اكتفي بعلبة وحدة او اثنين فيها الالوان الطبيعيه و قليلة , مو لازم تشتري كل اللوان الارواج اذا ماتحبي الاحمر مو لازم تشتري احمر خذي الوان تحبيها و تكوني عارفه انها تناسبك .

نصيحتي في العطور انك ما تكثري لان ممكن تجيك هدايا هذا غير انها لو كثيره بعد فترة من الزواج يكون نفسك تغيري و تشتري عطر جديد بس اللي عندك لسا ماخلصت , هذا غير العطور اللي تتطلع مع مجموعات الجسم , اختاري عطر او عطرين جودتها ممتازة انتي تحبيها و تناسبك في كل الاوقات سواء بالنهار او بسهرة , حلو انك تختاري عطر تخصصيه بس لشهر العسل لو سافرتوا او تخصصيه بس لأول شهر من زواجكم عشان ترتبط معاه كل ذكرياتكم و بعد فترة لمن ترجعي تشميه تتذكري احلى ايام , حتى في ذاكرة زوجك تكون مرتبطه عنده هذي الريحه بذكريات حلوة .

بالنسبة لمنتجات العناية لا تغيري شي من روتينك ابدا الاشياء اللي انتي متعوده عليها اشتريها وتجنبي المنتجات اللي فيها عطور عشان ما تختلط عليك الروائح مع بعض و افضل لبشرتك , لو انتي مو متعوده على مناديل ازالة المكياج على سبيل المثال مو لازم تشتريها , مو لازم تشتري 50 مرطب جسم لان بعد الزواج تتراكم عندك و تتطفشي منها المنتجات اللي تستخدميها لوجهك و جسمك و شعرك يفضل انك ماتغيري فيها شي , بالنسبة لمجموعات الجسم زي ذا بودي شوب و باث اند بودي و فكتوريا سيكرت لا تكثري لا تكثري لا تكثري اذا جاتك هدايا اكتفي باللي جاتك اهم شي مايكون عندك اكثر من مجموعتين سواء هدايا او انتي جبتيها لو كثيرة مح تخلصيها بعد الزواج كلها تحتاجي اشهر عشان تخلص و تكوني انتي تبغي تشتري جديد و روائحها اساسا تتغير لو جلست فترة طويله .

نصائح عامة :

اهتمي بصحتك لانها هي الاساس لو عندك مشاكل وزن او بشرة العياده و العلاجات لحالها ماتكفي التغيير من نمط حياتك مهم حافظي على اكلك صحي و اشربي مويه اولا عشان نفسك ثانيا يمكن الزواج يكون دافع او محفز لك بإدخال عادات صحيه جديده على حياتك , حسابي على الانستقرام و مدونتي مليانة مواضيع و معلومات ممكن تفيدك .

طوري من نفسك و ثقافتك اقرأي بكتب و تابعي محاضرات و اشخاص متخصصين في الاستشارات الاسرية و الزوجيه تعرفي اكثر على طبيعة المرأة و طبيعة الرجل و الاختلافات بينهم انتي مقبله على حياة جديده مع شخص جديد و تكوين اسرة لابد تتطوري من نفسك و من شخصيتك عشان تقدري تفهمي و تستوعبي العلاقه الزوجيه و التحديات اللي ممكن تواجهك و مستقبلا تكوني ام مثقفة و فاهمة وتعكس هالشي على اطفالها .

اقرأي اكثر عن الجانب الصحي بعد الزواج و التغيرات اللي ممكن تحصل بجسمك و كيف تتعودي على الوضع الجديد , العلم و المعرفة سلاح تقدري تواجهي فيه اي عقبات ممكن تواجهك سواء صحيه او نفسيه .

تذكري دائما ان فترة التجهيز مو شراء و ملابس و و و و … الخ انتي محتاجه تجهزي نفسك نفسيا و عقليا وجسديا و تتكلمي عن قناعاتك و مبادئك مع زوجك و اولوياتك بالحياة و تكوني صريحه وواضحه و تعبري عن مشاعرك بشكل عقلاني و تزيدي من ثقافتك ووعيك وتحطي اسس تبني عليها باقي حياتكم مع بعض و هذي كلها محتاجه منك قراءة و بحث و مافي اسهل من الانترنت اليوم , اليوتيوب كنز محاضرات من هذا النوع في التعامل مع المرأة و الرجل بالانجليزي و بالعربي .


اقتراحات كتب :

لغات الحب الخمسة , الرجال من المريخ و النساء من زهرة , امور لم يخبرونا بها قبل ان نتزوج

شكرا على وقتكم .. دمتم بصحة و عافية

 

الإعلانات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

This site uses Akismet to reduce spam. Learn how your comment data is processed.